Медыкі раёна падвялі вынікі года
На мінулым тыдні ў актавай зале бальніцы сабраліся медыкі раёна, каб падвесці вынікі сваёй працы за мінулы год і намеціць задачы на сёлетні.
На пачатку пасяджэння са справаздачай выступіў галоўны ўрач бальніцы Аляксандр Макарэвіч. Ён засяродзіў увагу на асноўных справах і паказчыках дзейнасці лячэбных устаноў раёна за 2014 год. Як вынікае з даклада, зроблена нямала і ёсць значныя поспехі, але галоўны ўрач заклікаў не спыняцца на дасягнутым. А. Макарэвіч паставіў перад калегамі задачы на будучыню, выкананне якіх дапаможа значна палепшыць аказанне медыцынскай дапамогі і ў канчатковым выніку захаваць здароўе браслаўчан.
У рабоце медыка-санітарнага савета прынялі ўдзел начальнік упраўлення аховы здароўя аблвыканкама Юрый Дзяркач і старшыня райвыканкама Уладзімір Дранеўскі.
У сваіх выступленнях яны падкрэслілі, што з пастаўленымі задачамі калектыў справіўся на “выдатна”, што, несумненна, вельмі радуе. У сваю чаргу і начальнік упраўлення аховы здароўя аблвыканкама, і раённы лідар паабяцалі ўсебаковую падтрымку галоўнаму ўрачу бальніцы і медыкам, выказалі надзею на тое, што агульнымі намаганнямі можна палепшыць здароўе насельніцтву, будзе выпраўлена і дэмаграфічная сітуацыя ў раёне.
Закончылася мерапрыемства на прыемнай ноце. Лепшым медработнікам раёна ўручылі ганаровыя граматы ўпраўлення аховы здароўя, падзякі райвыканкама і галоўнага ўрача.
Генадзь Швец,
урач-валеолаг ЦРБ.